مــعــادلــة طــحــن الــمــواطــن
Tuesday, July 31st, 2007كل يوم تصبـّـحنا الصحف بتقارير عن إرتفاع أسعار السلع من رز وزيت ولبن وطحين حتى الماء ماسلم منهم
وكل مرة ترد وزارة الإقتصاد بأنه لا يوجد زيادة في الأسعار وإنها متحكمة في السوق .. وإنها رفضت الزيادة
عاد التجار عليهم من الوزارة وإلا من المستهلك…
هم زادوا والناس تعاني والجرايد كل يوم تنشر … والوزارة تقول إذا حد شاف زيادة تبلغنا
هل إنتوا محتاجين حد يبلغكم … وين مفتشينكم … وين مراقبينكم… وين قوانينكم الي التجار ضاربين فيها الحيط
وماشاءالله عليها الوزيرة فالحه بس تنزل عطر بإسمها … وياليت بعد بسعر معقول بل بألف درهم للعلبة … صح 20% تبرع للجمعيات الخيريه لكن بعد الربح 800 درهم
(اللهم لاحسد)
والتجار ماشاءالله عليهم يعرفون كيف يتلاعبون بالأسعار
يعني الوزارة تمنحهم حق زياده الأسعار بنسبة 20% يقومون يخففون من وزن كيس الرغيف من1000جم إلى 600جم .. يعني زيادة 40% … شفتوا جشع أكثر من هذا
والوزارة تقول راح تدرس زيادة الأسعار وترفعها ل اللجنة العليا لحماية المستهلك الي راح تقرر
طبعا الصيف والناس مجازة وماأدري إذا أعضاء هاللجنة العليا موجودين وإلا مجازين ومصيفين في الخارج
فحتى يرجعوا ويدرسوا … ينخرب بيتنا بهالزيادات
جشع وطمع التجار + وتخاذل وعدم جدية الوزارة = معادلة تطحن المواطن والمقيم الكادح
لكن فعلا مثل ماقالوا محد قلبه على الناس غير شركة بيبسي الي من طلعت والعلبة بسعر واحد ماتغير على مدى العقود الي فاتت وملتزمين بسعر الدرهم الواحد…
فالله يهدي شركة المرطبات وماتزيد هي بعد
ودمتم،،،،
عـائـــشـــة

