Archive for ديسمبر, 2005

أضـــعـف الإيـــمـان – الــدعـــاء

الجمعة, ديسمبر 30th, 2005

السلام عليكم ورحمة الله وبركاته

كنت قايله إني ماراح أكتب بس من الي يصير حواليه يدفعني للكتابه دفع

مواقف وأمور تصير وأحداث تجري تخلينا منصدمين ومانعرف كيف ممكن نتصرف حيالها … بس الوقت يجري بسرعه وتتطور الأمور والأحداث وإحنا مازلنا في عنصر ولحظه الصدمه ومش قادرين حتى نرتب أفكارنا عشان نعرف كيف نفكر ونتخذ قرارت تحمينا وتقي عيالنا من محدثات الأمور

أمس وأنا واقفه مع بنتي في الستاربكس ناخذلنا ريوق قبل ماندخل عرض هاري بوتر… شفت ريال في أواخر الثلاثينيات من عمره وبنته الي أعطيها بين الخمسة عشر والستة عشر يعني زهره توها تتفتح … البنت كانت بلباس المدرسه من غير عباه، وشيله ملفوفه على الراس بس عشان تقول تراني موجوده
الأب شكله محترم وحشيم… لما شافني واقفه أنتظر دوري عالكاونتر خلى بنته وهو سار يلس عشان مايغثنا
البنت ماشاءالله عليها حدث ولا حرج… الأظافر تركيب بطول 3 سم وعليهن ذاك الفرنتش مانيكير والحواجب منتوفه نتف ولا نانسي عقرب أقصد عقرم

سألتها وأنا أفور وأغلي من الداخل: في أي صف إنتي يابنيه؟
قالت إنها فالصف الثاني ثانوي … ومن لبسها عرفت إنها في وحده من مدارسنا الخاصه
دقايق والا بنات من مدرستها بلبس ماأدري كيف بنات في سنهن يلبسنه ومكياج فاضح وشيل على الأكتاف… شكلهم متواعدين… وضحك وغمز ولمز… وهذا على مرأ من والدها، أبوها الي يالس ويتفرج

أنا الي ماأعرف البنت لا أصلها ولا فصلها قام دمي يفور في عروقي
كيف أبوها عادي عنده… بنته متزرزره ومنتفه حواجبها وثلثلين شعرها طالع ومركبه مخالب مش أظافر وهو عادي يالس يقرا الجريده ويشرب الكوفي ولا كأنه الموضوع يعنيه من قريب او من بعيد
…و باجر لو شي يصير على هالبنت … بيردون اللوم على الشباب

لو كنتوا في مكاني ياترى بتوقفون وبترَمْــسون الريال وبتنصحونه
وإلا بتسكتون وبتكتفون بأضعف الإيمان، الدعاء بأنه الله يهديهم

حريم في حفلة مدرسه مستانسات من بناتهم إنهن يالسات يرزفن و ييولن… هل اليواله فن ممارس من قبل البنات؟؟؟

الأمهات يشجعن ويصفقن لبناتهن… مايدرن إنهن يالست يشجعن بناتهن انهن يتشبهن بالرياييل
هالبنات الي كانن صغار ويرزفن وييولن في حفلات المدارس اليوم فالجامعات وطـلّـعن ظاهرة البويات على قولة أمي البويه عرفنا إنها الي يعقونها فالبحر وتتم طافيه عالماي ماتدري أمي إنه البويات هالزمن هن بنات توهن متـفـتـحات بدال مانربيهن على الحياء والعفاف والطهاره والإيمان والعلم والإخلاق… ربيناهن على الدلع وعلى انه الي في راسهن يسوونه لو شو ماكان وإنه هن دايما على صح والرياييل كلهم خمام يبون يقصون على البنات مب من شوي نشوف كثرة حالات الطلاق عندنا والسبب تأثر بناتـنا بالمسلسلات الخليجيه الي تبين انه الريال دايما يريد يستغل الحرمه وانها دايما مهضوم حقها
ومن ظمن حوار مع وحده من هالبويات إنسألت هل انتي تتصرفين كأنج بوي جدام أهلج وإلا من وراهم قالت ولله الحمد أنا عمري مادسيت عن أهلي شي يعني بلا فخر وليش تسوين هالشي ردت إنه شو إن شاءالله تبوني أحب ريال، مب إنتوا للي قايلين لا تحبين الريال حرام
يعني إنتي لازم تحبين، حبتج القراده وعلى هالشذوذ إستغفرالله

ماأقول غير الله يهدينا ويهدي عيالنا ويحفظهم ويهدي أمة محمد صلى الله عليه وسلم

يـقولـون الزمـان بــه فــسادٌ … وهـم فـسـدوا وما فـسـد الزمـانُ