Archive for يونيو, 2005

ست سنوات يامريوم

الأربعاء, يونيو 29th, 2005

أمس إحتفلت بيوم ميلاد مريومتي
ماأصدق إنه صارلي ست سنين في مهنة الأمومه
أشوف مريومه وهي تكبر جدامي
فديتها والله هي بالنسبالي شي كبير ماأقدر أوصفه

باجر إذا الله راد بسافر معاها برجع مانشستر
وهاي أول مره أسافر معاها من غير أمي، أسافر معاها بس مع أمي يعني عندي حد يخفف عليه الحمل
هيه دايما تسافر مع أمي بس معايه أول مره

بشوف كيف بتمر التجربه
أخليكم مع صور الحفله

Maryoma9 and MudhishThe GroupMaryoma with Bro and SisThe CakeThe PartyChilie's Staff

أرقى مايتعلمه الإنسان في الحياة

أن يتعــلم……….. أن لا تكــون نهاية علاقتــه مع الصديــق هي بداية كــرهه له فقــد تنتــهي المحــبة ولكن يبقــى التقدير والاحتــــرام

أفراح وأعراس – 2

الجمعة, يونيو 24th, 2005

بما إنّا بعدنا في موسم الأعراس، فأستكمل اليوم حديثي السابق عن الأفراح والأعراس

فالبدايه أتمنى إنكم تطولون بالكم اليوم الكتابه شوي طويله – مب شوي إلا وايد – فإلي ماعنده وقت حق هذربان الحريم ينزل يقرا آخر فقره

خلال هالسبوع حضرت ثلاث عرسات
الثلاثاء والأربعاء والخميس
وراح أعطيكم إنطباعي عن الواجبات الإجتماعيه الي أديتها

عرس الثلاثاء

حضرت عرس ولد عمتي، طبعا واجب عليه ولازم أأديه، كله ولا العمه تزعل عليه، بالذات إنه أمي ماتسير الأعراس الي في الفنادق
طبعا بتقولون ليش الحجيّه ماتسير، الله يطوّلّي بعماركم أمي في أوائل الثمانينات أول مافتحوا الكارلتون تاور على الخور، وأعتقد إسم الصاله زعبيل ، عزموها عرب على عرس هناك، ويوم سارت دخلت هيه ويارتنا من الباب الرئيسي وعشان يوصلون قاعة الإحتفالات لازم يمرون عالبار
فالوالده زاغت وقالت ثرها جيه السالفه وترد على وراها وترجع البيت من غير ماتحضر ، ومن يومها وهيه تسير العزايم الي فالبيت أو القاعات مثل قاعات قرية البوم وقاعات المركز التجاري ووهقتني أنا بالفنادق
أرجع لحفلة الثلاثاء
الحفلة فالجراند حياة، أنا طبعا متزقرته وحاطه المكياج وكاشخه باللبسه الصينيه الي كنت أصلا لابستنها في عرس بنت خالتي قبل ثلاث أو أربع سنوات ومكلفتني 3800 درهم. وصلت المكان عالساعه 9 ونص، وقفت عند باب القاعه ويستلمون السياره خدمه توقيف السيارات – خدمه مريحه حق الحريم الي يسوقن – وأنزل وأتفاجأ بطابور من الشرطيات، طبعا أنا ماأدري شو سبب وجودهن بالإضافه إلى أربع شباب مواطنين وكل واحد قابض جهاز لاسلكي
طبعا أنا قلت ليش؟ حاضره مؤتمر القادة وإلا وين بالضبط
العرس كان مرتب راقي يبين عليه إنه مصروف عليه من الزينه والديكور، وماشاءالله عالمزايين لبسهم وايد راقي يمكن مبالغ في الكرستالات الي على لبسهن بس مايمنع انه لبسهن كان راقي ، وسمعت إنه من تصميم إيلي صعب
كل شي زين والضيوف يتوالون على الحفل وشوي ويدخل المطرب الإماراتي – عيضه – الي بيحيي الحفل مع مجموعه من المطربين الي هم راشد الماجد وحسين الجسمي وقالوا حكيم بعد بيي بس متأخر
طبعا أنا إنسعقت عيضه صح مطرب والنعم فيه بس ريال فالنهايه ، ومعناتها الكشخه كلها بتسير وتحجبنا وراحت التسريحات الي يلسنا ساعه كامله نشتغل عليها
من دخلت العروس ماقدرت أيلس زياده لأنه راسي ورم من الموسيقى والدق، أهم شي إني أديت الواجب تجاه عمتي، والصراحه ماكنت مرتاحه الجو متوتر من وجود المطرب الريال، هالشي لا من دينا ولا من عاداتنا إنه ندخّل رياييل غرب علينا في عرساتنا
بس الظاهر الناس من كثر فلوسها مب عارفه شو تسوي، أو يمكن هالبَطْرَه جيه تسوي

حفلات يوم الأربعاء

اليوم لبست فستان مفصلتنه من كم سنه بس ناسيتنه فالكبت، وتمكيجت وسويتلي تسريحه فالبيت – طبعا إيدي عورتني وانا أحاول أضبط التسريحه بس ضبطت الحمدالله
أول حفله كانت في بيت يرانا، ولدهم الله يعافيه من ذوي الإحتياجات الخاصه، أو مثل مانسميه في مجتمعاتنا معاق، عقد قرانه على بنت ماشاءالله عليها حبوبه وتعاني من نفس الحاله الي فيه
كان الحضور من عربنا وجماعتنا وسوالف وضحك والعشا كان من طباخ البيت ومن غير حاطين بوفيه
طبعا الناس لما تحط بوفيه، هذا الأسلوب وايد أحسن من ناحيه الصرف ومن ناحيه إنك تقدر تحط أصناف كثيره
بس أمهاتنا من يـِعرِفن إنه بوفيه قامن يتحرطمن، ومايطيعن يسيرن يحطن لعمارهن عشا
وتطيح على راس أصغر وحده على الطاوله
على قولت أمي – عنبوه غير طلاليب كل وحده شاله صحنها – طلالييب يعني مساكين
ومن يابوا العروس طلعنا وسرنا الحفله الثانيه، في قاعة الملتقى بالمركز التجاري
ولد جيرانا بس عيم
طبعا عرسات العيم معروفه إنها ربشه، والكل مستانس وماعندهم فيه حتى الأمهات يصفقن ويرقصن
طبعا هذا نوع من أنواع المشاركه فالفرحه عندهم
العرس مرتب وحلو وديكوراته راقيه فيه مطربه مصريه بس زينه ومعاها رقاصتين مغربيات
أم المعرس كانت مستانسه إنه قدرنا نحظر العرس وخصوصا إنها قبلها بيوم متصله تأكد علينا
أعتقد أنا وأمي كنا العربيات الوحيدات فالعرس ودخلنا العرس حوالي الساعه 11
العروس ماشاءالله عليها وربعها ملمومين حواليها أم المعرس تستقبلنا ويحطونا في مكان مميز
شوي وإلا يدورن حرمات بسليل مليانات مناديل مطرزه، بعدين عرفت السبب، هاي رقصه وايد مميزه عند العيم
رقصه المناديل أو السمايل الصراحه ماعرف الإسم بالضبط
والغريب إنه حتى المطربه علموها كم كلمه عيميه ، ومانسمعها إلا وهي تقول جلجموش كركموش جلالش ، عاد مادري بعد جان صح ها الي لقطته منها
ورقصوا البنات والعيايز ماتم حد ، وماشاءالله عليهم الكل مستانس وشوي الا ياييبن المعرس تبارك الرحمن هاك الطول واللحيه المخنيره ، والبشت
ووقف ياعروسه والتصوير والاهل الكل فرحان، وردينا البيت مستانسين بس صداع من الدق والموسيقى

حفلة يوم الخميس

ياسلام قاعة مكتوم فالمركز التجاري كبيره تضم العرب من غير مايتراصّون أو تستوي كضه، الباركنات متوفره فالطابق العلوي وتنزل بالأصانصير لين مكان القاعه
اليوم بعد كنت متعدله في البيت ولابسه بدله عندي من قتره – زين انه وزني ماتغير وايد ويازت عليه هالبدله
عند مدخل القاعه سليل مليانه هدايا عباره عن كتيبات وأشرطه محاضرات – يزاهم الله خير
وفالداخل يتلقولك أهل العرس من الفريقين، الكل في تناغم الكل مبتسم وفرحان
هالعرس مبين عليه إنه مصروف عليه عدل
البنت من عايله غنيه فهالشي متوقع إنك تشوفه من ترتيب وأفكار حلوه
ام العروس تقودك لطاولتك الطاوله مرتبه بشكل إنه الجالسين عليها كلهم يالسيين مجابل الكوشه
المقبلات والحلويات مرتبه بشكل حلو عالطاوله
خدمة القهوة والشاي والعطر والحلويات تدور عالعرب
الشاي أنواع – حمر، زعتر، نعناع، مغربي
القهوه أنواع – عربيه، تركيه، نسكافيه و كاباتشينو
الحلويات – حلوى عمانيه، فقاع، شوكولاته، حلويات مغربيه، زليبيا، خبز جباب وعليه عسل، عصيد
المكسرات – فستق، حب البوبر، كازو، حب اللوز، تين مجفف، تمر باللوز، ومكسرات مخلوطه – وكانت الفكره حلوه عربات فيها أكياس مخمليه مزينه وكل كيس يحوي صنف من المكسرات
العطورات – زيوت عربيه من كل شكل ولون، وعطورات فرنسيه من الكارتير لين أنيل جوتال ونينا ريتشي والشانيل والجيرلاين

ماكان فيه مطربيين ولا ديجي، كانت أناشيد وزفه العروس على أسماء الله الحسنى، والله عيّشونا في جو جميل راقي التسابيح والتهليل مع جمال العروس وجمال فستانها
ونفس الشي لما زفوا المعرس حطّوا نشيد جميل ماأذكر أبياته الحين، بس كلماته وايد حلوه
وطول وقت العرس أم العروس وأم المعرس يدورون على الطاولات ويرحبون بالناس ويتأكدون انه الكل مرتاح ومستانس
يوم يجتمع المال والأخلاق والدين، تكون تركيبه عجيبه ، ماشاء الله عليهم الله يسعدهم ويهنيهم ويفرحهم يارب

_______________

مثل ماشفتوا تنوعت الحفلات من الغلاء الفاحش لين الترتيب البسيط لين التقليعات الغريبه
ياترى يوم الواحد بيفكر في عرس كم لازم يحط ميزانيه، هل الميزانيه تعتمد على وضعي الإجتماعي والمادي، وإلا لازم أشياء تكون أساسيه حتى لو ماكان عندي الماديه اللازمه

=>” src=”http://www.blog.co.uk/img/smilies/icon_arrow.gif” /> Read more!</a></p>
<div class=

أفراح وأعراس

الأحد, يونيو 19th, 2005

ماشاءالله موسم عرسات وأفراح والكل مشغول ومربوش
بس هالعرسات حملهن ثقيل على ميزانية الواحد
يعني لو أنا عندي ولد عمتي وبنت خالتي وولد خالي بيعرسون خلال هالشهرين… معناته إنه معاش شهرين مابيطيح يديّه
لوّل لفلوس الله إمبارك فيهن، بس هالزمان الدنيا شابه ضو
كل شي فالسوق غالي وبزياده
عبايات – عبِيْ – ب 20 ألف، ليش، أختي تقول ترا الموضه جذيه مايلبسون غير شي بسيط تحت العباه والعباه تكون فخمه
قلتلها تراني أبا عباه يديده حق كل عرس مابَوَبّل
الفساتين حدث ولا حرج، رامي العلي عقب ماكان يفصل إلنا الفساتين ب 2500 قامت اسعاره تبتدي من 15 الف
وأمي فديتها كانت تتحرطم عليه يوم تشوفني أفصل تقولي انتي ينيتي وماتخافين ربج، ماكانت فيايه أمس وانا فالأبراج وأشوف تصاميم عبي للمصممه إليزابيث ولا فيهن شي
عاد يوم رديت البيت أخبر أمي ويدتي عن هالعبي، أمي قالتلي جيه أمي مصبوبات ذهب وإلي هيه يدتي قالت خل هاي زبيت تلبسهن مِسْوَدّةْ الويه، ينِنن ببناتنا.

شو قالت أمي من جذيه الله شال بركة لفلوس هالأجانب يو وغلوا بكل شي ويشوفون العرب خبايل مايردهم شي يوم يقولوهم بذيج الحجيه قالوا برايه اندوكم، والي يسوي جيه هذا سفيه ولابحاس جيمة لفلوس ماتعب عليهن

ومن ظمن الرمسه كان موضوع شيق، كنت دايما أفكر فيه

شو سبب كثرة أعداد المطلقات والمطلقين

يعني الشباب لا يتحسبون عادي إنه يطلق ترا حتى هو لقب مطلق يكون لصيق فيه ويوم بيي يعرس مره ثانيه وبيعرفون إنه مطلق بينحط ألف إميه علامة إستفهام على طلبه

في تقديري الشخصي، البيئه الي يربون فيها البنات والشباب ماتهيئهم لتحمل المسؤوليه
البنت ماتروم تصب لعمرها كاس ما ، والشاب مايعرف كوعه من بوعه،
الي يهمهم الطلعات وأحدث الأفلام والمطربين والماركات

الله يعينّي ، اليوم أتمشى مع بنتي في سنتر من السناتر وتقولي ماما هالمحل فيه ماركات، راسي عورني وقلتلها شلج إنتي فالماركات ردت وقالت إنتي ماما تقولين ماركات

البنت يوم تعرس محد ينبهها إنه الزوج مسؤوليه والزواج مشاركه وطاعه
والشاب يوم يعرس محد يفهمه إنه الحرمه لها حقوق واحترام وإنها مش بشكاره عنده

من أول مشكله كلن نطر بعمره وسار في دربه
هو إيي من الشغل منهك وهي جان تشتغل نفس الحال
تغدوا في أي مطعم وجان عايشين عند هله كلوا من الموجود ورقدوا لين المغرب
نشوا هو سار عند ربعه وهيه كذلك

وين هيه الحياه الزوجيه
الشاب ماتعود يتحمل مسؤوليه عمره ، وفجأه عقب العرس ينطلب منه إنه يتحمل مسؤوليه روح ثانيه معاه

يوم العرس أهل العروس وأهل المعرس ، ماتقول هذيل بتربطهم علاقة نسب لا تقول عداوه من بينهم منوا بيطلع أحسن عن الفريق الثاني
وصرف وفخفخه عالفاضي، والبنت ماتكمل شهرين أو 3 إلا راده بيت هلها

الله يستر على بناتنا وشبابنا، ويهديهم ويصلح شانهم

فيه إقتراح كانت وحده من ربعي الخليصين مقترحتنه، تقول

يوم بعرس ، بكتفي بعشا حق الرياييل يوم بيملجون ونسوي عشا حق فريجنا عشان يعرفون إني عرست
وبيدخل عليه في نفس اليوم
والفلوس الي إمبونه بيخسرها على العرس، بنسافر شهر عسل اسبوعين درجه أولى لأفخم مكان والباقي بنحطه في بيتنا الي بنسكنه
عن عمري شفت إنها فكره وايد حلوه،
إقتصاديه وعمليه

أتمنى لكل من ما حالفه الحظ في زواج سابق إنه ماياخذ موقف سلبي أو ماينزعج، الحياه عباره عن شراكه ياتنجح ياتفشل
أهم شي إنه الإنسان مايخلي الفشل هذا شماعه حق كل فشل أو تراجع يصيبه فحياته

الواحد يتعلم من كل شي يمر فيه، ويحاول ياخذ الزين من أي تجربه تمر فيه

Wedding

اللقب مايقشل والأصايل أصايل
إنتي مطلقه ؟! لا يزعجك هالسؤال

أحلام تتحقق

الثلاثاء, يونيو 14th, 2005

الحمدالله على النعم التي أنعمها الله علينا

في لحظات يتغلبنا اليأس والتشآؤم وننسى ان الله رحيمٌ بعباده

فبعد مراحل من اليأس والإحساس بالفشل، يبرق لي بصيص من نور، وأكمل مشوار الحياة

من وظيفه لدراسه لوظيفه أعلى لدراسه بدرجة أكبر
لبنوته حلوه فديتها، لدراسات عليا

واليوم وأنا أشوف مريومتي يكرمونها في المدرسه بتفوقها بأفضل إنجاز في مادة الكمبيوتر على مستوى طالبات مرحلة الصف الأول، أثلج صدري وغمرني بفرحه ونشوه ، لم أفق منها حتى الآن

وأنا أشوف بنتي وهيه تستلم الجايزه ، ياالله ماأحلى هالموقف
فديت هاك الويه وهي تضحكلي من بعيد وانا أصفقلها

كم تسوى هاللحظات، والله مايعادلها أي شي بالنسبه لي
صدق إنه من زرع حصد، وانه لا يأس مع الحياة
الإستسلام لليأس ماكان بيوصلني لأي شي من الي أنا فيه الحين،
الحمدالله أشكره على هالأفضال والنعم الي غمرني بها

هالدرس لازم الكل يتعلمه إنه مش أي عقبه ممكن توقف الإنسان عن تكملة دربه
مش إنك تفشل في ناحيه من حياتك معناتها إنك إنسان فاشل، ممكن الظروف الي ماساعدت انك تنجز مهمتك على أفضل مايرام، ممكن الطرف الثاني ماعرف يقدرك أو ماعرف يتعامل معاك

الواحد يخلي إيمانه بالله كبير ويثق في نفسه

أتمنى النجاح والتوفيق للجميع يارب

Maryoma3Maryoma4maryoma & teachers

مقاله مؤثره للكاتبه فاطمه الفقيه

الحنا … زينة الحرمه

الأحد, يونيو 12th, 2005

أكيد معظم البنات والحريم عندنا يحبون يحطون الحنا ويزينوبه إيديهم وريولهم وشعورهم بعد

بس أنا ماأطيقه فحياتي

أمي تقول شوفي مازين صبوعج وهن مخضبات بالحنا

ويدتي تحرج وتقول عنبوه تخلن إيديكن جنهن إيدين ريال
وإلا يوم العيد عنبوه ماحنيتن يديكن ماعيدن فياكن

اليوم وديت مريومتي عند لمحنيّه تحني يديها باجر عندهم حفله نهاية العام الدراسي

ومريومه بماإنها إمي الي مربيتنها فأفكارها نفس الأفكار الي عند أمي
فطلعت تحب الحنا وايد… المهم عند لمحنيه هيه تتحنا وأنا لايعه جبدي من ريحة الحنا… وساعه ونص محجوزين فالصالون عشان الحبيبه

وأشوف الحرمات كلهن منسدحات الي محني يديه والاي يديه وريوله،
بس أريد أسأل سؤال… كيف الواحد يضيع ساعتين أو ثلاث ساعات وهو يالس في وضعيه وحده عشان هالحنا؟

حشا أنا أحس إنه يوم أحط الحنا جني طايحه فالمستشفى ، نفس الإحساس

وياليت يتم مده طويله ، هو إسبوع والسبوع الثاني يبدا يطير، وعاد يتم شكله مول مايتشاهد

أذكر سنة 91 كنت أدرس في دبلن وعيدت فلبلاد ويوم رديت عقب الإجازه ربيعتيه متحنيه نقش كامل، قاموا الطلبه الأجانب الي فيانا يعلقون ويقولون أخ شو هذا
وأنا الحبيبه مسويه قصه “هاي النقشه الجديمه مالت العيايز” وانا من النوع الي كنت وايد أقرض ضفوري
فيوم شافتني مدرسة الإنجليزي وشافت الحنا قالتلي شو حاطه صبغ على صبوعج عن لا تقرضين ضفورج
والله ويهي عورني ، وقلت التوبه بعد أحط حنا

بس شكلها مريوم بتغصبني إني أحط الحنا، اليوم عزرت عليه بس ماعطيتها ويه، بس الله العالم عقب بتقدر تأثر فيه وأغير راي وإلا بستمر على موقفي الرافض للحنا، الله وأعلم

Traditional Henna

أبركض فالمطر وابتل
وإذا أرعبك المطر ليلة
أنا أرعبني الجفاف
! ..سنين

نعمه

السبت, يونيو 11th, 2005

نعمه إنك عايش في بلادك وبين أهلك
نعمه إنك تنش في بيتك وانته حاس بأمان
نعمه إنك تيلس فحوي بيتك قبل المغرب وحزة الآذان تسمع الآذانات تصدح في أرجاء المكان
نعمه إنه عندك أم تلجأ إلها وبس تحضنك تحس إنه كل شي يهون دام في قلب حنون يهتم فيك

فديتج ياأمي … الله لايحرمني منج

waiting

يمكن رحلت وماسأل عنى احد
يمكن رجعت ومادرى عنى احد

ماأحلى الرجوع إليك

الجمعة, يونيو 10th, 2005

كيف يكوت إحساس الوحده لما تكون على موعد مع زوج، حبيب، عشيق
تكون ماشيه لمكان الموعد، وهي ماتدري وين ريولها موديتنها، تحس بنبضات قلبها تضرب بالقو وهيه تمشي بسرعه ولا تحس بالي حواليها، بتركض لو ماشي ناس، إحساس خوف رهبه شوق وله، كل الأحاسيس متلخبطه، تحس بمعدتها بتنط من مكانها، وتشوفه من بعيد وكل ماتتقرب كل ماتزيد ضربات قلبها، وتحس انه اريولها مش قادره تشلها وتتلامس اليد باليد، وتسري رعشه في الجسم، وقطرتين تتساقط من على اطراف الجبين، تحس بنْصخه على ويهها ودفْوَت حضنه وتغمض عيونها وماتحس بالدنيا وتشوف كل شي وردي والدنيا من تحتها تدور وتدور وتدور

هذا هو الإحساس الي مريت فيه البارحه وأنا طالعه من شقتي وسايره جدا المطار وأركب الطياره
سبع ساعات وزياده وفيلم
After the sunset
وعقبه فيلم
Shall we dance
أراقب شاشه التلفزيون واعد الدقايق
وكل ماتنقص الأميال كل ماأحس بأعصاب معدتي تشد عليه
كل ماتنقص دقيقه قلبي تزيد دقاته
وتنزل تواير الطياره تعلن عن وصولها تدور على المطار وتنزل شوي شوي شوي، وصوت اصطكاك التواير مع أرضيه المدرج زادت من عنف ضربات قلبي
وتمشي تمشي تمشي لين ماتوقف ويقربون الخرطوم ويفتحون البوابه
مشيت بين الكراسي وطلعت من الطياره وانا مابين الواقع والخيال
معقوله انا هنيه وبشوفه
امشي على السير المتحرك هو يتحرك وانا اتحرك بسرعه
الدنيا حر واحساس بإختناق مش قادره أتنفس وقلبي بسرعه يدق أسابق المسافرين واحط كرت البوابه الإلكترونيه وتنفتح البوابه الأولى واحط سبابتي وتنفتح البوابه الثانيه
واسابق الوقت الساعه تخطّت 12 ونص
آخذ الشنطه وامشي بسرعه، نقطه التفتيش وامشي عنها اوصل اركب السياره وتمشيبي بسرعه
الدنيا ليل وظلام في كل الجهات
أوصل البيت واحس اني مش قادره انزّل ريولي ومش عارفه كيف ممكن أمشي واوصل لين عنده
كلهم راقدين، البيت ظلام وصخّه، وانا احس انه الكل راح يسمع نبضات قلبي وجبيني مندّي من التوتر مش قادره أتنفس وأفتح الباب وأشوفه هناك
مكانه مثل ماتركته
وأطيح في حظنه، حظنه الي لمني بكل حنان، إحساس بالراحه بالإستقرار، هو بعد مشتاق لي، حظنته بالحيل، ريحته ملمسه كل شي فيه يجنن

ماأحلى الرجوع إليك، ماأحلاك ياسريري

والله أحبه وماأرتاح غير عليه، مع إني في مانشستر في شقتي الخاصه، بس بعد هنيه غرفتي وسريري يوم أحط راسي عليه وأرقد يتجاوب معايه إذا إنجلبت يمين وإلا يسار يفهمني ويرتخي تحتي أو يشد على حسب رغبتي

وايد أحب سريري
ههههههههههه شكلي وايد عندي حنان ومن كثر ماهو وايد حتى الشبريه قمت أحبها……

حبيبتي مريوم كانت راقده عالشبريه غيرت ثيابي وطحت حذالها وحظنتها ورقدت

Swan

To succeed you have to believe in something with such a passion that it becomes a reality

أول إتصال

الخميس, يونيو 9th, 2005

كلمتني مريومتي العصر وهيه فديتها فالليل أمس تعبت
تقولي أمي إنه نشت عالفجر بطنها كان يعورها ورجّعت، عاد |إحنا ماشاءالله علينا بعدنا في عصر الديناصورات، فأمي عطتها إزعتر تاكله ولا خلتها الصبح تسير المدرسه
والضحى من نشت من الرقاد سِقَتها حلُول
وتقول إنه الحمدالله حلها بطنها كذا مره

maryoma

عاد فاجأتني وهيه ترمسني تقول : ماماتي أنا أعرف رقم مي – مي ربيعتها فالمدرسه
فقلتلها من وين يبتي رقمها، قالت لا ماماتي هيه إتصلت فيه كانت تسألني ليش ماييت المدرسه وعطتني رقمها

هنيه أنا بطلت عيوني مش مصدقه، أول مره مريومه عندها ربيعه تتصلبها البيت

maryoma1

فرحت وإستانست لأني كنت دايما خايفه إنه مريومه شوي خجوله ولا حسبها تخالط الناس، وهيه صف أول وكل ماأسألها منو ربيعتج الي أكثر فياج فالصف تقولي كلهم

وهي من النوع الي صعب تندمج مع أي حد، وأنا أحاول إني دايما أطلع معاها وإذا نسير كوفي شوب أخليها بروحها تطلب إلها،صح فالبدايه كانت تتضايق وماتطيع تاكل، بس عقب قامت تتشجع وبالذات اذا يكونن بنات إختي معاها، هن أكبر عنها باربع سنين ونسنمثل فيهن

بس اليوم ربيعتها تتصل فيها، معناته إنها أكيد فالصف قريبه منها، وأنا دوم أرمّس مدرستها وتقولي لاتخافين بالعكس هيه وايد محبوبه عند االكل واذا بنسوي قروبات كلهن البنات يبن يكونن فيا مريومه

maryoma2

بعدين يلست أتذكر متى ومنو كانت أول ربيعه تكون إمبيني وإمبينها علاقه من هالنوع

متى أول مره أتصل فيها مع ربيعه أو هيه تتصل فيّه
ماأذكر مول، بس وايد اللي ترابعت فياهم، حد تام فمكان من الذاكره وحد إختفى وحد بين فتره وفتره أسترجع صورهم إذا شفتهم صدفه، وفي ناس ننفصل عنهم بهدوء وفيه يسوولنا زوبعه يكرهونّا نفسنا ونكره اليوم الي تعرفنا فيه عليهم

ياترا فيه حد لين الحين محافظ على صداقه الطفوله، وإلا الزمن غيرنا وماعدنا إحن نفس الأطفال الي كنا منطلقين على الحياه ونضحك ونلعب، ونرابع كل البنات، قمنا نحاسب ونفكر الف إمية مره قبل لا نفتح قلوبنا لأي وحده، قمنا نفضل إنْتِم بروحنا ولا نغث عمارنا بحد مايثمن الرِبْعه والصداقه

ناس نشوفها كل يوم، لاموعد ولا شوق بس أقدار
…..
ونـاس غايـبه، بس لـــها بالــقلب مـــقدار

هدايا .. هدايا .. هدايا

الأربعاء, يونيو 8th, 2005

باجر إذا الله راده لبلاد، وماكنت مقرره أشتري هدايا حق حد غير بنتي، وكنت قايله بشتريلهم حلاوه، طبعا هم يعني الصغاريه”عيال إختي: شواخي،ميثوه،مريومه وحصّوصه.. وعيال أخويه: رشّودي، أمّون وبطي.. وعيال أخويه العود: حميد، وبشّوري وعواس” هم كلهم يتريون متى أرد لبلاد عشان أنا الي مدلعتنهم… ومعودتنهم كل حد بهديته… بس من يومين تعبانه وضاغطه على عمري عشان أخلص كل تقاريري لانه هناك في دبي الواحد مايروم يسوي شي طلعات وزيارات وضيوف

المهم الي صار إنه كل هالترتيب إخترب
أمس إشتريت أشرطه جيم بوي حق مريومتي

GameBoy

واليوم الصبح من وقت ناشه وسرت أسدا وخذت الحلاوه، يعني مصاص ومارش ميلو وجيلي بينز وهالخروشان

Sweet

وقلت بس مابشتري شي
بس إتصلتبي بنت …. أخويه .. وهيه وحيده بين 5 أولاد وبشرتني بنتيجتها.. هيه ثانويه عامه والمدارس الخاصه طلعت اليوم نتايجهم.. عاد ماشاءالله عليها يايبه 93,3
قلت لا تستاهل الريم… وأنا من أمس شايفه شنطه ديور مالت الخريف بس ماشتريتها وسبحان الله طلعت من نصيب بنت أخويه وهيه فديتها تستاهل…

Dior

وطبعا إذا أسير السوق ماروم أيود عمري .. فإشتريت عطر لأمي وثياب ولعوب لمريومتي

Perfumes

Dresses

Toys

آآآه خلصت الشوبينج، ورتبت الشنطه، مع إني ماكنت معزمه أشل شنطه كبيره بس تيمعت الهدايا

الحين أفكر كيف بسوي حفله ميلاد مريومتي.. تاريخ 28 يونيو وهيه بتكمل 6 سنوات

كل سنه أسويلها ثيم معين العام كانت بات مان وقبلها تيلي توبيز ومره طرزان ومره مدهش

السنه عاد هيه طالبه سنو وايت من قرت قصتها وهيه متخبله عليها وانا فالإيستر شتريتلها لباس سنو وايت الحين عاد من اوصل بيلس ارتب الديكورات والهدايا والكيك

مدلعهتنها صح… بس شو أسوي راس مالي هالمريومه وأحب تكون أسعد وحده

الله عليج يادبي أسميج والله شي

عودة القط

الثلاثاء, يونيو 7th, 2005

THE CAT RETURN

هالفيلم من إنتاج إستوديو جيبلي – 2002. الإخراج لهيريوكي موريتا

The Cat Return

طبعا أنا لما عرفت انه هالاستوديو هو الي أنتج فيلم سبيريتد أوي (Spirited Away) قلت أكيد بيكون الفيلم فيه تقنيه انيميشن حلوه نفس الي شفتها في الفيلم القبلي واستمتعت فيها وايد انا وبنتي لدرجة إنا إشترينا الدي في دي

فيلم عودة القط عباره عن دراما تحكي عن عالمين مختلفين هما عالم البشر وعالم القطط

هارو – المراهقة المتخبطه في عالمها، مرتبكه، وخجوله ذات حظ عاثر، تعجب بطالب زميل لها – ماتشيدا– لكن عن بعد. وفي مساء يوم من الأيام وهي تمشي مع زميلتها – هيرومي – تندفع بقوه لتنقذ قط كاد أن يدهس فالشارع. وقبل أن يختفي، وقف القط على رجليه وشكرها على إنقاضها له، تاركا هارو مذهوله

friend

Luna

في نفس الليله، زارها ملك القطط – تامبا – محمولا في موكب مهيب للقطط، ليشكرها بنفسه للصنيع الذي فعلته في إنقاذ إبنه الأمير – لونا – ومقدما لها العديد من الهديا مثل الفيران والقمح، بالإضافه إلا خطبتها للزواج من إبنه. ودفعت للذهاب إلى مملكة القطط، ولكن بمساعدة القط الغامض – بارون – إستطاعت أن تثق في نفسها وتعبر عن أرائها، وتخرج من هذا العالم السريالي بشخصية أقوى عن ذي قبل

Tamba

Cats

help

Weeding

Cats

Baron

with the Baron

The Cat Kingdoum

تقييمي للفيلم: إفتقد هذا الفيلم السحر والجاذبيه والعمق الي شفته في فيلم سبيريتد أوي. وأعتقد إنه أخفق في ردم الهوه بين ترفيه الأطفال و جودة الأنتاج

فيلم بين الكوميديا والخيال, لكن يميل الى القدم من حيث استخدام التقنيات الفنيه في انتاج الرسوم المتحركه

لكن سذاجة وطيبه هارو وغرابة وتهور القطط أكيد بتخلي الكل يضحك. ماشي وجود للشر او شخصيات شريره في هذا الفيلم، وافضع شخصيه كانت شخصيه الملك الأب غريب الأطوار، وأقدر اقول انه كان شقي أكثر من كونه شرير

الحلو انه كان فيلم ناطق باللغه اليابانيه، وكلامهم يذبح يجنن. انا لقطت كمن جلمه من الي دارت في الفيلم، ومنها:

نيكو: قط
زوكا: أوكي
كاسكوتي: مضحك
كوري ييه: تعالي
إريجاتو: شكرا
كارو: هو هذا
نا إنا نا: شو هذا
أوميجي: لوسمحت
أوس: لا
ساماو: آنسه
جوميه: آسفه
آي: نعم
كاكو يي: حلو
ساكو: إذا
يادا يادا يدا: مش هذا
نانو: شو هالأشيا
جو تي ماتا: إنتظر
موتا: متين
ماساكو كوكو: شو هالاشيا
كاني: مملكه
سايي نارو: مع السلامه
إيو ها: صباح الخير

أكيد بتقولون هاي شو موديه ورقه وقلم وياها ويالسه تكتب، بقولكم لا أنا كنت أكتبهن على موبايلي
عاد أظني هاي هيه معانيهن، والخايس أوسامو ، طالب ياباني كان يدرس فيايه ماطاع يعلمني جان صح والا لا

بس مابيقص عليه، سويت سيرج وهذا الي طلعلي:

EVERYDAY GREETINGS
ohayou (gozaimasu) – Good Morning!
konnichi wa – Hello (lit. this day) {11am – 5 pm}
konban wa – Good Evening (lit. this evening) {5 pm – night}
o yasumi – Good Night {it’s beddy-bye time – also used when saying ‘Good-bye’ late at night}
sayonara – Goodbye! (actually they use the English ‘Bye-Bye’ more often!)

HOW ARE YOU & THANK YOU
O-genki desu ka? – How are you?
genki desu – I’m fine
anata wa? – And you?
arigatou – Thanks
doumo arigatou gozaimasu – Thank you very much

FIRST TIME
hajimemashite or douzo yoroshiku – Nice to meet you.
kochirakoso,yoroshiku onegaishimasu – Same here, nice to meet you too.

IN EVERYDAY LIFE
dou desu ka? – How is this? How do you like this?
dou ieba iin deshou ka? – What should I say?
tada ima – I’m home! – شرات هود هود عندنا
akemashite omedetou – Happy New Year
kotoshi mo douzo yoroshiku – This year too, show me kindness.
(honjitsu wa) omedetou gozaimasu – (On this day) Congratulations!!!
gomen nasai -I am sorry
sumimasen – I am sorry; Pardon. Excuse me…
moushi wake arimasen – I have no excuse for my bad bahavior, sorry

OTHER
hisashiburi – It’s been a long time
o ikura desu ka – How much is it?
ki – a tree
mizu – water
kaji – a fire
nichi, hi, jitsu – [day, sun]
getsu, gatsu, tsuki – [month, moon]
rai gatsu – next month
hanabi – fireworks – الله هنابي وين همباج يالفجيره
kin, kane – [gold, money]
do, to, tsuchi – [earth, soil]
tochi – the ground, land

COLORS
kiiro wa kirei desu – Yellow is pretty
sora wa aoi desu – The sky is blue
kore wa akai hana desu – This is a red flower
yuki wa shiroi – Snow is white
ki wa midori desu – A tree is green
kuroi fuku ga suki ja nai – I don’t like black clothes

شكلي إندمجت وايد وطولت عليكم

كانت تجربه حلوه اني احظر فيلم باللغة اليابانيه
هاي مش أول مره أحضر فيها فيلم أجنبي غير الإنجليزي، حاضره فيلم تاكسي – الإنتاج الفرنسي، وفيلم إسباني عن حرمه مصابه بالسرطان، وفيلم صيني بيت الخناجر الطائره وفيلم إفريقي

هالسينمه قريبه من شقتي تعرض افلام ثقافيه أكثر منها أفلام شباك مثل مايقولون. إسمها الكورنر هاوس فيها 3 صالات، هنتين فالبيسمنت ووحد تحت سكة القطار. ولا يبيعون فرّاخ ولا ناتشوز – يعني زين حق الي يسوون رجيم – بس الله يبارك في السينسبيري ” سوبرماركت” مجابل الكورنر هاوس، يعني تزود وسير. والصالات صغار يشلن مال 40 50 ان كثرن

أتذكر فلبلاد دوم أقرا إعلانات فالجرايد إنه المجمع الثقافي فبوظبي وإلّي في دبي وإلّي فالشارجه عارضين أفلام ثقافيه من مختلف أنحاء العالم، بس ماقد سرت ولا طرا على بالي، بس هنيه مدرستي بات هيه إلّي شجعتني إني اسير مسرحيات واحضر افلام ثقافيه تعرض أداب من مختلف أنحاء العالم
وتقول إنه هالشي يغني فكر الواحد ويخلي أفاقه منفتحه على آفاق اوسع وأرحب

The Corner House

سوبرماركت

أهم شي إني غيرت جو من الدراسه وبعدين أنا راجعه عقب يومين لبلاد، وهناك أكيد بستانس زياده لاني متوله على مريومتي واريد أحظنها بالقو ومتولهه على حظن أمي وعلى ريحة يدتي

الوصل داري ومربايه
ياإلهي تعودني فيها