Archive for مايو, 2005

اليوم غيرت شوي من ديزاين البلوج… لانه الديزاين القبلي ماكان عايبني… وكنت بنقل لشركه ثانيه توفر د…

الثلاثاء, مايو 31st, 2005

اليوم غيرت شوي من ديزاين البلوج… لانه الديزاين القبلي ماكان عايبني… وكنت بنقل لشركه ثانيه توفر ديزاينات أحلى بس هالشركه وعدتني بترقيه فالانظمه عندهم… فقلت بتريا وبشوف بالذات لانه الشركات الثانيه عندها قصور في امور موجوده في هالشركه

متعه الحياة أن تكون في حظن من تحبه ويحبك

النجاح هو أن تنتقل من فشل إلى فشل بكل حماس

وحشتيني يامريوم

الإثنين, مايو 30th, 2005

مانشستر بدت تفضى من الطلبه الي كانوا مالين شوارعها
النهار صار طويل وممل
اليوم الاثنين كان البانك هوليدي
وكل شي يسكر من وقت
حتى الستاربكس الي كنت اضيع فيه وقتي وآخذ كتبي عشان أقراهن فيه سكر من الساعه 5
ملل فضيع
مش قادره أتحمل الكتمه الي حاستبها
المفروض أرجع لبلاد أواخر يونيو بس شكلي بعد إجتماعي مع المشرفين بسافر
إجتماعي معاهم تاريخ 6-6
بعدني ماحجزت … ومريومتي كل يوم تنشدني ماماتي متى بتين
ولهانه عليها وايد
كل مااقرا كتاب أتعقد زياده واضيع واتشتت
الدراسه صعبه.. لما مايكون فيه مسار واضح مثل حصص او مواد تدرسها واخر الكورس تمتحن فيها او تسوي بحث .. تحس انك طاير وماشي ارض صلبه توقف عليها

مفتقده كل شي في دبي
بنتي، ريحتها، أمي ، وحضنها, يدتي, وسوالفها
اللّمه مع اخواني وخواتي وعيالنا كل خميس عالغدا ويا عمي علي
وضحكنا انا واختي
سوالفي مع ربيعتي صافو
فريجنا ومحطه ايبكو
بحر الممزر والمشي والرياضه عليه
سيارتي البي ام
غرفتي … وكبت ثيابي وطاولة التسريحه
ميركاتو وجميرا
شكسبير والريوق اللبناني
تفصيل العبي والشيل
الله عليج يادبي

ماقد خطر في بالي اني اصور دبي والاماكن الي اسيرلها
كنت دايما يوم أسافر اشل الكاميرا… واصور وايد قبل الصور العادي والحين الديجيتل
بس كلهن بدون فايده
ودي أصور صوره اخزن فيها كل ذكرياتي فالموقع الي اصوره

الحياه حلوه بس ليش احسبها ضايقه عليه

الله يفتحها علّيه وعلى كل من يحس نفس إحساسي

مريومتي

مريوم لوتدرين…. إنتي أصدق أيام السنين

متفرقات

السبت, مايو 28th, 2005

أحاول ارتب أفكاري بس وايد أشياء تدور في مخي… وهالشي متعبني وايد
كنت أقرا انه تفكير المرأة هو ملتي بروسيسور يعني تقدر تفكر في أكثر من شي في وقت واحد ويسمونه بعد التفكير الحلزوني… حشا مب مخ هذا من الزواحف حلزوني هههههههههه

أخبار… أخبار …. أخبار

سمعنا عن الانتهاكات على حرمة المصحف في معتقل جوانتناموا، وعن المسيرات والإحتجاجات الي سرت في أرجاء الوطن العربي ، بس ليش ماشي اي تفاعل في مجتمع الإمارات للي صار
كل مره تمر أشياء تمس الكرامه العربيه وتدنس الحرمات الإسلاميه ومانشوف غير الجمود في الشارع الإماراتيز
انا مثلا كل الي قلته الله على الظالم وجلبت القناة الي كانت تبث الخبر. وأدري انه هالتصرف تصرفه وايد ناس من ربعنا فلبلاد
ليش …. ماأقدر أفسر هالشي

برنامج قلم رصاص لحمدي قنديل… كل الي أقدر أقوله تعظيم سلام حق الحريه الصحقيه والجرأة الغير معهوده لهذا الإعلامي الكبير. أسلوب راقي فالإنتقاد وعرض الإخبار بإسلوب يشدك … ويبين وضع الأمه
سلام ياأمه

قلم رصاص

برنامج نجم الخليج… ماأدري كيف ممكن أصنفه … وبتقولون منو إنتي عشان تيلسين تقييمين برنامج مصروف عليه عدل… بقولكم أنا مشاهده إغتثيت من صوت المذيعه الي جنه خلصوا المذيعين في الخليج عشان إييبون هاي المذيعه في برنامج يبحث عن الاصوات الجميله
يوم المذيعه صوتها يخرم الإذن كيف بالنجوم الي بيطلعون

زواج المثليين… إنصعقت من خبر أمس في الجريده هنيه في مانشستر يقول: تم عقد زواج فلانه التي تبلغ من العمر 46 عاماً على شريكتها علاّنه البالغه 53 عاماً… في ذمتكم شو هالناس… يعني لو صغار بنقول ناس بعدهم ماعقلوا مابلغوا وممكن يسوون أي شي… بس هذيل عقب ماصالوا وجالوا فالدنيا يايات يبن يعرسن … فضل عنكن والله خايسات … لكن لادين ولا أخلاق شو بنقول
بعد ماشاب ودّوه الكتّاب

الحب في زمن الكوليرا…. من أروع الكتب الي قرأتها… للمبدع غابرييل غارسيا ماركيز
أنا قريت هالقصه مترجمه سنة 1991 بإقتراح من وحده من البنات الي لي معاهن ذكريات حلوه في سكن طالبات جامعه الامارات في العين.. إقترحت عليّه أقراه.. وشو ياخذ العقل… من يوم أنا ياهل كنت أشوف انه الحب شي محرم … يمكن هالشي لطبيعة تربيتنا إنه الكلام عن هالامور من المحرمات وعيب شو هالرمسه… وكنت أشوف انه الحرمه بس تكبر عيب تفكر في ريال أو أي شي يتعلق بعواطفها… هالأفكار لازمتني فتره طويله من حياتي وأثرت في تكوين مشاعري .. بس هالقصه تروي كيف حب الطفوله إستمر رغم الضروف الي منعت تواصل الشخصين … شي حلو في سياق جدا ممتع… والشي الي عيبني الكلام المستخدم فالروايه… صح كلام ماجن أو ما يسمى الأدب الجنسي.. أكيد بتقولون شو هالطفاسه بس مانقدر ننفي إنه الجنس جزء لايتجزء من حياتنا…
صح انا قاريه هالروايه قبل 14 سنه… أمس وأنا أسولف مع شلة بنات من قطر الحبيبه طريتلهم هالروايه … وتمت تتراوالي طول الليل.

لم ترا – LAMMTARA
مبدع تعجز الكلمات عن وصف هذا الفنان الرسام المصور الكاتب – صدق ماعرف كيف ممكن أوصف محمد سعيد بن حارب. زياره إلى موقعه تفي تعبر عن اعجابي بهذا الصرح…

الفريج
أول رسوم متحركه بتقنية الثري دايمنشن
3D

فريج

صور مميزه

Lammtara Photos

ميموريز كافيه – Memories Cafe

قصه عشت فيها وابهرتني الطاقات الكامنه لهذا المبدع- كيف استطاع ان يضع هذه التصورات عما ستكون عليه دبي سنه 2020 والتقنيات التي ستتوفر.

أنحني لك أيها المبدع الإماراتي الرياضي الفنان

أتمنى إني أقدر أتمكن في يوم من الايام إلتقاط صور تعبر عني – اكيد بيي هذا اليوم لاني وايد أفكر فهالموضوع – أكيد يباله كيمرات ذات تقنيه عاليه – خل أتفجج من الدكتوراه وأتفيق حق التصوير.

MAD dogs and Englishmen go out in the Midday sun

بعد عشرين يوم

الخميس, مايو 26th, 2005

آآآآه بعد معاناه … وبعد عشرين يوم… قررت

قررت اني اكسر الرجيم الي كسّرني … عشرين يوم نزلت اربع كيلو بس… وجبتين فاليوم ورياضه ولاشي فايده
الريوق حليب خالي الدسم وبران فلكس والعشا آكله من وقت سلطه خضرا او خضره مفوره او خضره مشوايه

تعبت … تعبت …

بس لا وألف لا…. والله يوعانه

ماشي غير اني اسير وامزر البطن … شو يقولون وداوِها بالتي هي الداءُ

وين … عدالي مطعم ايراني… خل أهجم عليه
تلبست وانا فيه رقاد ومتكسره هذا كله من اليوع وأير عمري ير
بس سخافه 5 شباب دخلوا قبلي… ماباخذ راحتي

مافي غير اسير روشم … وأين روشم … روشم للي مايعرف هذا فريج لهنود
يسمونه الجولدن مايل… وال سبايسي مايل
كله مطاعم على الصوبين ولا شارع الضيافه بس مطاعم هنديه وشي شوام

روشم فريج الهنود

المهم ركبت الباص وتوكلت على الله

فالباص

وصلت على خير

هذا هو المطعم الي يعدل النافوخ

كاسبيان – مطعم كردي لكن شو كباب عليه

مطعم كاسبيان الكردي

طلبت

طلبت كباب كبده

فالانتظار على المدار… في بالي آكل فالوذه … كوفي شوب مون لايت عندهم فالوذه عجيبه… بس لا عيب… شي واحد يالكباب يالفالوذه… أكيد الكباب والعيش هههههههههههه

مافي غير الكباب

بسرعه برد الشقه يوعانه

وهذا الكيس وحطيناه

الكيس

وفتحناه

الطلبيه

وصفيناه على الصحن

طبق اليوم

وهم يا جمل كلناه

بالهني والعافيه

الحمدالله……… آآآآآآآآه أحلى شي الكوك ولا بعد حلال شو ابا اكثر عن جذيه

طمطم تقول حرام خساره العشرين يوم
ماعليه شوي وبقوم اكوي ثيابي اونه عاد عشان مايأنبني ضميري… هههههههه

شي شعر، وشي حزن، وشي مزن، شي فوق، وشي ذوق… وباقي الأشياء شوق

….حل عملي

الخميس, مايو 26th, 2005

تكلمت قبل كمن يوم عن مشكلتي مع غراش الماي وانه بشرب من البيب بما انه الشركه اكدتلي انه ماي صالح للشرب
بس بعد مش قادره اشرب من البيب … واليوم آخر غرشه أفتحها
إذا ماهو الحل… انا ماروم اسير السوبرماركت واشلل الغراش لين الشقه
مب كسل بس تعب

بس حصلت على الحل… طبعا لني مش متعوده على هالامور… فلبلاد الله يخلي البشاكير والبشكارات والله مساكين وايد متحملين
المهم حصلت على هالشنطه الترولي
Shopping trolley
حصلتها في محل
Habitat

Shopping trolley

واليوم بستخدمها… وبشوف كيف بتكون عمليه

بخليكم وبسير الجامعه عندي كتب مستعيرتنها برجعها وبييب مجموعه يديه من الكتب …طبعا هاي مش قصص هاي كتب تخص بحثي

:قال الشاعر طاغور
أريد أن أفتح نوافذي على الجهات الأربع، على الريح الأربع، ولكني لا أسمح لأي منها أن يقتلعني من جذوري

أحدث عطورات صيف 2005

الأربعاء, مايو 25th, 2005

بما إني أعشق شي أسمه عطر … فطبيعي إني بكون متابعه أحدث العطورات في الماركت
ومايلي مجموعه من أحدث ماأنتجته دور الأزياء في العالم:

Thierry Mugler – Peony Angel
Thierry Mugler – Lily Angel
Thoerry Mugler – Violet Angel

Ralph Lauren – Lauren Style

YSL – Opium Eau d’Orient

Nanadebary – Green

Dior – Addict 2
Dior – Miss Dior Cherie

Michael Kors – Island

elizabithW – Magnolia

L’Artisan Parfumeur – La Chasse aux Papillons Extreme
L’Artisan Parfumeur – Extrait Songe

Kinzo – Summer

Issey Miyake – L’eau d’Issey Summer Water

Calvin Klain – cK One Summer

Chloe – Collection 2005

Annicke Goutal – Les Nuits d’Hadrien

Angela Flanders – Moroccan Rose

Bond No.9 – ChinaTown
Bond No.9 – Wall Street

MATTHEW WILLIAMSON – The Exotic

Summer 2005 Collection

ديور منزله شيري وهذا أحدث شي –
أنا عيبتني ريحة كالفن كلاين سمر –
الأوبيوم بعد حلوه ريحته فرش –
الإيسي مياكي السمر ووتر حلوه ريحته –
الكلوي بعده مانزل عندنا بس موجود في الامازون دوت كوم –
وأحدث شي نازل في الهارفي نيكلوس مجموع عطورات تحت اسم –
(Bond No.9)
وهم 22 عطر بس أحلى واحد هو الرجالي وول ستريت لون الغرشه أسود وهالمجموعه تعتبر من أغلى العطورات فالهارفي تتبتدي الاسعار من 79 باوند
عطر ماثيو ويليامسون –
توه نازل امس حتى الي عارضينه بس التسترات وهو عطر بريحه الياسمين وشوي اوريانتل بس وايد وايد وايد حلوه ريحته… انا دفعتلهم عشان أحجزلي غرشه

وهاي هيه جولتي لأحدث العطورات وإن شاءالله بيكون لي جوله ثانيه فالشتا اذا الله راد

نسيانهم لا يكفي … وإستعادتهم من المستحيل

أشياء تضايقني

الأربعاء, مايو 25th, 2005

أمس كنت أتكلم عن المواصلات والباصات
واليوم بتكلم عن شي وايد يزعجني فشوارع دبي…
(بتقولون هاي شو مشتغله مراقب فالبلديه او فالمرور… DD)

بس في اشياء تصير تشوه بالمنظر العام لدبي الي تحاول تنشر صورتها على انها مدينه متحضره….

مثلا من الاشياء الي استغرب منها عند اشاره المرور وين بلديه دبي في مكان حق عبور المشاه… الا انه موظفين البلديه الي المفروض يكونون هم المثل حق الغير تشوفهم يعبرون الشارع من كل الاماكن….

من الاشياء بعد الي تثيرني

“مع انه قبل كنت اسوي هالحركه بس الحين اصطلبت”

تكون واقف في سيد شو طوله عند اشارة مرور … وإييك واحد عالبراد يتخطى الكل ويرز بويه سيارته جدام عند اولّي السيد

كنت ساعات اقول احنا المواطنين الي نخرب الانظمه… لكن لا والله الي انتبهتله انهم اجانب او وافدين عرب… عاد هاذا الي يقهر زياده … انهم اجانب ويخالفون…. بس يمكن احنا الي علمناهم… مادري

تكون واقف في طابور الكاشير فالجمعيه او عند ال
ATM
آله الصرف الآلي
وتتريا دورك الا اييك واحد او وحده عرض … غير آبهين بالي مصطنيين ويدرعمون “يدزون” بعمارهم جدام…. حوه وين تبون … اوقفوا فالطابور… بس مافيه اخلاق…


مره في فيينا واقفه بدفع في محل انا وبنتي وجدامنا 3 حريم اجنبيات وإلا تييك هاك الخليجيه وتدز بعمرها جدام الاجنبيات … تتحسب محل ابوها… والله ماسكتن الاجنبيات فتنن عليها وقاللها ردي آخر السيد.. انا افتشلت وين هيه

مريومتي في فيينا

المفروض لما نشوف حد يخالف النظم نتكلم … بس كل الي نسويه نفج حلوجنا مستغربين ولا نرمس … ونتم نحترق في داخلنا… وهنيه بنكون مثل الشيطان الاخرس…

وبعد الظاهره الي منتشره الحين فلبلاد والي شفتها بعيوني وانا في اجازه الإيستر… كنت في ميركاتو مع بنتي

على قولت امي المزبن .. كل خميس انا وبنتي الضحى هناك هيه تلعب وانا اتيلس في الكوستا كافيه

المهم
وأنا يالسه استمتع بالكافي لاتيه واقرا جريده البيان… والا اشوفلك هالصفاعنه اثنين ريال وحرمه متحاضنين ويتباوسون…. @@ 8|

الصراحه انصعقت… انا الي عايشه في بلاد الاجانب ولازم يكون عندي هالشي عادي متعوده اشوفه الا اني ماقدرت حتى اتنصخ
معقول… كنت اسمع بس ماقد شفت بعيني… استحيت وين اشل بعمري
طرشت مسج حق بنت عمي… والصراح هيه لو كانت هنيه كانت بتتصرف بطريقه اشجع مني ( مع انها تقول اني بطله )… تدرون شو قالتلي هاي غلطتنا نحن… جان سرتي وقلتيلهم الي تسوونه غلط وينافي العادات والاعراف في هاي لبلاد… هم اغشما ويمكن يوم خذوا الويزه محد نبههم حق هالامور…بس احنا الي لازم نتكلم ونفهمهم…. الصراحه… انا ماأظن عندي الجرأه … بس هذا يعتبر من الامر بالمعروف والنهي عن المنكر…. وماأدري اذا صار جدامي هالموقف مره ثاني شو بسوي… بس اخاف يقولولي هاي حريتنا الشخصيه … او شي من هالكلام الكبير الي لو عندي فرصه بقدر ارد عليه بس لما تتفاجاء بالشي اتم متبنج ولا تدري شو مستوي….

صدق الاخلاق .. الأخلاق.. الأخلاق
الي عنده أخلاق وقيم بيعرف يتصرف … وإلي عنده مذهب مابيتعدى على حقوق غيره … لما تدخل جدام غيرك في صف انته ماعندك مذهب… ويوم تعبر في الشارع من اي مكان انته شرات البهيمه ماعندك مذهب… ويوم تسكت عن هالاشياء تكون ثقتك في قيمك ضعيفه ولازم تكون اشجع….

ولد الخاله بلوج مب سمجه … أظني تحسبتها شرا الجنعد والقباب لا….

“Blog” is the short form for “Weblog” (which is something like an internet diary)

وايد استانست انه حد يدخل ويقرا الي اكتبه…. عطوني ويهه تراني فغربه … شوي ببتدي أشحت DD

البساطه المحشوه بتفاصيل معقده

باصات – مواصلات عامه

الثلاثاء, مايو 24th, 2005

وأنا في السوق يلست أتفكر فالناس هنيه فالبلدان الأجنبيه
ليش عندهم عادي يركبون الباصات واحنا لا
تشوفهم فالباصات دكاتره بروفيسورات محامين ونواب وناس الهم مناصب ربات بيوت موظفين طلبه… كبار وصغار
محد مفتشل بالعكس هيه افضل طريقه عشان توصل وين تبى وانت محافظ على اعصابك

Queue in the bas stop

قبل 6 سنين لما كنت موظفه فالاتصالات زارتنا باحثه كنديه تسوي دراسه عن المواصلات العامه في دبي
ولما سألتني قلتلها ماقد ركبت الباص فلبلاد… وماظني حد بيركب هنيه… وكان ردي فذاك الوقت انه شو الي يحدني اتداعس مع الغُرب وانا عندي سيارتي الخاصه
لكن بعد ماتفاقمت مشكله المرور في دبي … وصارت شي لايطاق… اعتقد لازم نعيد حساباتنا
كنا نقول كيف احنا حريم نركب في باص المواصلات … وهاي الها حل … يسوون اقسام خاصه بالحريم
والحكومه ماقصرت صرفت عشان توفر احدث انواع المركبات… بس بعد فيه عزوف من المواطنين
يمكن حد يقول انه طبيعتنا كخليجيين مانرضى نركب مع اي حدن كان
ويمكن حد شراتي ساكن برع لبلاد يقول المواصلات ماتوصل قرب بيتنا..

بس بعد نقدر نفكر بطريقه عقلانيه
في دبلن
سنه 1990 كان عندهم قانون… اذا السياره تدخل وسط البلد
City centre
اقل شي يكون فيه 3 من الركاب والا بيكون في مخالفه
تعتقدون لو يسوون في بدايه دبي من كل الجهات مباني حق المواقف ونركب باصات عشان انسير الاسواق او الدوامات بيحل شي من مشكله الزحمه
يعني مبنى قرب الراشديه ومبنى قرب أم اسقيم وواحد عند القصيص

أحاول اتخيل شكلي وانا سايره ميركاتو مع بنتي ونوقف السياره في مجمع الباركنات قرب ند الشبا وناخذ باص
الصراحه اريد اجرب هالتجربه فلبلاد….

StageCoach Bas

أنا هنيه في مانشستر وايد مستانسه على خدمة المواصلات … ماخذه بطاقه اشتراك لمده ست شهور… وطالبتنها من الانترنت ودفعت اون لاين ووصلتني لين شقتي… الباصات متوفره لكل جزء من المدينه
وفيها خدمه حلوه مجانيه الي هيه جريده يوميه اسمها
METRO
تنشر كل شي يستوي فلبلاد – أقصد مانشستر –
من الاحداث السياسيه والنشره الجويه والفنيه أحدث الافلام والمسرحيات والاخبار الرياضيه – لاتنسون انه نحن هنيه معقل كرة القدم الانجليزيه وعندنا نادي
المانشستر يونايتد
اقدم واغلى نادي في العالم – يعني تركب وتقرا وتوصل المكان الي تباه من غير حرق اعصاب ولا تشل في ذمتك من كثر ماتسب خلق الله في الشوارع


لا نملك … إلا أن نغمض أعيننا … ونحمل أحلامنا … وألواننا … وأجمل ذكرياتنا

الماي

الثلاثاء, مايو 24th, 2005

من أسبوع وانا كسلانه عن سيرة السوبرماركت .. هو مش بعيد أخذله باص وعشر دقايق وانا هناك
بس اني أحمل كراتين الماي “صح التاكسي بييبني الشقه” واشلهن من التاكسي لين الشقه فالدور الرابع … هاي بروحها مشكله…
من فتره طويله وكل حد يقولي الماي في مانشستر
Safe
ونقدر نشربه من البيب
وانا كنت اقول مستحيل …. بس الصراحه مب مشكله لفلوس مشكله الحمل الثقيل هيه الي خلتني افكر في موضوع الشرب من البيبات…
اتصلت في الشركه الي مسؤوله عن العماره وتاكدت منهم انه نقدر نشرب الماي عادي من غير اي خطر
بعدني شاكه فالموضوع فشكلي بسير وبشتري فلتر هالي يحطونه على ويه البيب او الجهاز الي مثل الدله يسوي فلتره حق الماي
يعني فالنهايه بسير السوبرماركت….

أشرب من الغرشه والا من البيب

أمس حطيت موضوع الهندي وأتمنى محد ياخذ على خاطره وخاصه الي فيهم عرج لهنود … هذا مش تحيز مني لعرجي العربي… بس يقولون حلاة الثوب رقعته منه وفيه… انا مثلا ما اتصور نفسي مع شخص مش من بلادي يمكن قطري “كونهم أقرب إلنا ياهل دبي من باقي الخليجيين” .. ولا اتصور نفسي ارابع حد اجنبي حتى البنات ربعتنا بتكون سطحيه او مش وايد خالصه …
الي مب من دينك مايعينك
فحبيت التنويه فقط لاغير

وفي كل نهايه مقاله بحط كلمات قريتها في مكان ما وعجبتني ممكن شي منها يكون لي وشي منها من أشخاص أنا ماعرفهم بس موجودين على الشبكه العنكبوتيه” كلمة عنكبوتيه تزيغ صح هههههه”

إرتحال بلا معنى
ومرور عابر لمستبصر
في حياة كيف تفنى

البدايه

الإثنين, مايو 23rd, 2005

اليوم بس قررت اني اسويلي بلوج مثل الناس
يمكن الغربه هي الي دفعتني اني أقدم على هالخطوه
فعزّمت وتوكلت على الله
جدولي اليوم ابتدى كالعاده بما اني راقده متأخره لين ماصليت الفجر الساعه 3
واتصفح النت عشان آخذ فكره زياده عن البلوج

المهم نشيت الظهر وانا متكسره مش رايمه افتح عيني يالله يالله وقفت تحت الشاور..
اتنعوشت واتلبست وتريقت “بران فليكس” وحليب “سكيمد”.. شو اسوي اريد أضعف
وشليت كتابي ونزلت عالكوفي شوب…

كل يوم فالستاربكس اخذ زاويه وأشرب كافي لاتيه وسبراكل ووتر وايلس اقرا في المراجع الي عندي واكتب تلخيص وكل هذا عشان اكوّن خلفيه كبيره من المعلومات الي تخص رسالتي في الدكتوراه

“أدعولي بس انتوا”

لاتيه+سباركل+كتاب= مخمخه

من فتره وأنا أشوف هاك الفنان “صح هو هندي” بس فنان وسيم كشيخ إيّي
باللاب توب وييلس … وأنا ايلس اتفكر فيه وأقول الحين لو اتعرف عليه وأخاويه ماعندي ربع على الاقل يمشي الحال… وأوني يالسه ارسم عليه….
مالت عالحظ…. اليوم حطمني الخايس كان مواعد صديقته وحده شقرا فنانه….
هههههههههه… ضحكت على عمري اوني انقهرت وسبيته ولعنت سلسفيله…
أع مااتصور عمري اصادق هندي حتى لو كان بمعنى الصداقه العاديه
عقب يوم برجع لبلاد بهز راسي شرا الهنود
هههههههه…
عاد أحلى شي صار وأنا طالعه من الكوفي شوب… واحد كان بيدخل… أنا كنت موخيه أتاكد انه موبايلي فالشنطه والا أشوف هاك الي ردلي روحي… حسيت بعمري طايره فوق السحاب… شفت نعال تميمه بيج يجنن… حسيت بعمري فلبلاد… وناااااااااااااسه
أنا ماشفت ويه الريال بس اكيد راعي لبلاد دامنه لابس هالنعال… هو فوق لابس بنطلون وجاكيت أسود… بس من فرحتي مارفعت راسي عشان أشوف من هو راعي النعال… طبعا مب هو المهم … المهم النعال

الحمدالله اليوم أحس بعمري وايد أحسن عن الضيجه
الي كانت قابضتني من يومين

غربتي طالت متى وقت الرجوع